اللَّهُمَّ إِنَّكَ عَفُوٌّ كَرِيمٌ تُحِبُّ الْعَفْوَ فَاعْفُ عَنِّي

عــــــقـــــــدتى .... ســـــبـــب بــلـــوتـــــــى






السبت، 12 سبتمبر 2009

س و ج مع المعقدين


س : شوفت يا ج اللى حصل !!
ج : شوفت يا س شوفت ... ال مش عاوز يتغير .. هو حد طايل يتغير اليومين دول .

س : هو انت عاوز تتغير يا ج ولا ايه ؟
ج : يا ريت اتغير ... بس ازاى دا يحصل ؟

س : تتغير ازاى يعنى دا جنان دا ولا إيه ؟
ج : يعنى ابقى حاجة تانية ... الف لفة على الحروف كلها مرة ابقى ط .... ومرة ابقى ش ... والف يعنى كدا على الحروف كلها

س : ط و ش .... طش ... عاوز تبقى طش يا ج ؟؟
ج : بقولك ايه اطلع من نفوخى انا مش ناقصك .. خليك انت كدا محلك سر ... لانت عارف تتغير ولا حتى مش عارف متتغيرش ... زى اللى رقصوا ع السلم .. لا اللى فوق شافوهم ولا اللى تحت سمعوهم

س : ايه الكلام البيئة دا يا ج ... انت مستواك بقى اوفر قوى .. بس ان شا الله هحاول انى اظبط العملية ... واتغير بس للاحسن ان شا الله
ج : ابقى قابلنى ...

س : اقابلك فين ؟
ج : إن شا الله فى البوست الجاى هههههههه

التغيير


التغيير هو الشىء الذى نسعى إليه ... وقد يكون هو الشىء الذى يسعى الينا ... هو الشىء الذى نرغب به... وفى نفس ذات الوقت .. يكون الشىء الذى نهرب منه .

التغيير هو التحول مش شىء إلى آخر ... ومن نقطة الى أخرى .. قد تكون نقطة إلى الأعلى .. وقد تكون نقطة إلى الأسفل ... ولكن نحن لسنا نعلم اذا كان التغيير لنا ام علينا .

لحظة صمت
......


.......................................


.........................................................

مينفعش اتغير .... مينفعش .... ممكن الواحد يتغير شوية شوية ... انما خبط لزق كدا ... ازاى!؟

اانا اكيد نفسى اكون كويس " مش هقول احسن واحد فى الدنيا عشان مفيش حد بالاسم دا " بس التغيير بالنسبة ليا عامل زى العفريت ... مش عاوز اشوفه .. ولا عايز التغيير يشوفنى .
لكن كل شىء فى هذه الدنيا يتغير ... النبات .. الحيوان ... والجماد
ولو الواحد متغيرش ممكن يفنى ... يموت ... بس هيفضل زى ما هو .. بس برضوا لو الواحد اتغير ... ممكن يفقد هويته ويبقى حد تانى ... ويبقى هو ملهوش وجود ...

ساعات بقع فى حيرة ما بين الامرين ... اتغير .. متغيرش

لو اتغيرت ... اكيد شخصيتى دى .. هخسر فيها حاجات انا بحبها والناس مبتحبهاش ... وهحط فيها حاجات انا مبحبهاش ... بس الناس بتحبها فيا
مثلا يعنى ...لو بقيت شاب جامد طحن اخر حاجة ... طبعا يا ريت اكون كدا ... " بس الحمد لله انى مش كدا" ... اكيد هبقى زى ناس كتير ... وهبقى مواكب للموضة ... بس انا مش عاوز اواكب اى حاجة كدا وخلاص .
ولو متغيرتش .... اكيد شخصيتى العيوب اللى فيها هتفضل فيها ... ومش هعرف اتخلص منها ... وهعيش بعيوبى واموت بحسرتى عليها
مثلا لو فضل الواحد عايش لوحده ... محدش بينكش تفكيره ... ولا هو بينكش تفكير حد ... تفكيره هيبقى ليه سقف ... مش هيبقى تفكير مطلق .
هو كدا كدا الواحد بيتغير ... سواء رضى او مرضيش ... يعنى انا بكبر " مع انى مش حاسس بكدا ودى عقدة تانية " وسنى بيكبر ... ودا كله تغيير فيا ... وشخصيتى بتزيد فيها حاجات كتير وبتنقص فيها حاجات انا يمكن مش حاسس بيها ... بس اكيد متخزنه جوايا .. لحد ما يجى موقف معين ... والحاجات دى هتتطلع .
غير كدا وكدا ... الدنيا اللى انا عايش فيها بتتغير ... واكيد طبعا انا تبع الدنيا دى وعايش فيها ... وطالما الدنيا دى بتتغير ... من المنطقى انى انا كمان اتغير... الا بقى لو انفصلت عنها ... بس انفصل عن الدنيا دى ازاى " اطلقها يعنى " ؟
دا غير السرعات بقى فى التغيير .... انا لو عشان اتغيير ... باخد وقت ... لازم يبقى الوضع الجديد اللى هبقى انا فيه ... لازم يبقى فى عشرة... نقعد فترة كدا عقبال ما ناخد على بعض... ساعات بحس انى شخصيتى قوية ... مش سهله انها تتغير ... على عكس ناس تنام وتصحى تلاقيها حد تانى...وساعات بحس بانى غبى .... مش بفهم التغيير بسرعة ... مش عارف امشى مع الناس اللى بتتغير ...بقيت عامل زى اللى واقف قدام القطر ... لا عارف يروح شمال ولا يروح يمين ...
عاوز اتغير ... بطريقة سهلة ... ارتاح ليها ... وفى نفس الوقت احس انى بتقدم بيها


ونحن ... لم نكن ... وكنا .... وسوف لا نكون... ولولا التغيير .. لما كنا فى هذه الدنيا ... وما كنا سنرحل منها .
نفسى اتغير ... قبل ما يجى تغيير ... معرفش بعديه اتغير


أنا والمعقد

من هنا ... من مدونة عقدة ... نبدا حكايات أنا والمعقد .... وانا " اللى هو انا :D" والمعقد ... دا برضوا أنا ... يمكن اكون انا سليم .. بس جوايا عقد كتير ... ومن دلوقتى ... هبدأ أحاول أحقق مع نفسى ... واعرف ... ايه العقدة اللى موجودة ... واحاول افكها ... قصدى احلها .

عقدة التغيير

المعقد : التغيير بقى بالنسبة حاجة صعبة قوى قوى قوى
أنا : ليه بس دا الناس كلها بتحب التغيير وبتكره الروتين
المعقد : أنا بقى غير الناس انا بقى بحب الروتين ... اهو على الاقل الواحد بيبقى عارف الدنيا رايحة فين ... وجاية منين .
أنا : مش فاهم فهمنى اكتر
المعقد : يعنى بص انا مش عاوز افرح خالص ... بس مش عاوز احزن... عاوز ابقى فى النص .. لا زعلان ولا مبسوط... دا حتى لما ببقى حاسس انى هنبسط او هفرح بتنكد ... واقول هتحصلى حاجة وحشة .
أنا : لدرجة دى
المعقد : واكتر ....
أنا : بس مينفعش اللى انت بتقوله دا .. الدنيا لازم يكون فيها حزن عشان نحس بطعم الفرح ... لازم نتعب عشان نحس بطعم النجاح ... لازم ...
المعقد : يا عم انت هتخطب ما انا فاهم الكلام دا كله ... بس انا بقولك لو هفرح ... افرح على طول ... ولو هزعل ازعل على طول وامرى لله ... وهو دا على فكرة اللى بيحصل دلوقتى .
أنا : والله دى مشكلة كبيرة قوى ...
المعقد : تعرف انى رمضان لما بيبجى ببقى مش مبسوط
أنا : ايه دا ؟ فى حد يبقى مش مبسوط لما رمضان يجى ؟
المعقد : أنا
أنا : ليه بقى ؟؟
المعقد : اصل رمضان دا بيبقى غير شهور السنة كلها ... انا طبعا مبحبش التغيير .. ورمضان دا كله تغيير فى تغيير ... كل حاجة بتتلخبط الاكل والنوم والدنيا ... كل حاجة .. كل حاجة
أنا : بس بيبقى التغيير للاحسن
المعقد : ايوا بس عشان ادخل فى جو رمضان ممكن ااقعد اسبوع او 10 ايام متلخبط ومش عارف راسى من رجلى دا غير ان رمضان بيبقى شهر واحد عشان عقبال ما اتعود على جو رمضان يكون رمضان مشى ...ويبدا تغيير تانى بعد رمضان .. وطبعا باخد وقت عشان اطلع من جو رمضان .
أنا : مممممممممممم مشكلة
المعقد : اصل يا السنة كلها تبقى رمضان .... يا رمضان يقدم استقالته ويسيب السنة .
أنا : ههههههههه بس يا بنى اللى انت بتقوله دا جنان !
المعقد : دا للاسف حاجة مش بايديا ... انا باخد وقت كتير على ما اتغيير .. ساعات بتبقى حلوة .. لانى مش ببقى ماشى ورا اى حاجة والسلام ... وساعات بتبقى وحشة عشان مش ببقى مواكب الدنيا وحاسس انى متاخر عن كل حاجة
أنا : بس ربنا خلقنا كدا ... دا فطرة عليها الانسان ... انت عاوز تبقى ثابت ... وكلنا بنتغير ... بنجوع وناكل .. ونشرب ونعطش ..ونفرح ونزعل ... يعنى التغيير دا فى كل حاجة ...
المعقد : بس انا بتعب من التغيير ... يعنى مش ببقى رافض ليه ... بس باخد وقت عقبال ما اتعود عليه .. وطبعا الوقت دا مش بيبقى لطيف يعنى .. بس لما بتعود على الوضع الجديد ببقى كويس قوى .
أنا : فى الحقيقة حاجة صعبة قوى ... مشكلة !!!
المعقد :عارف ساعات ببقى مش عاوز البس حاجة جديدة لانى بحس انها غريبة عليا ... مش متعود عليها ...ساعات بغسلها الاول عشان محسش انها جديدة أحس أنها عادية .
أنا : وفيها ايه يعنى لما تحس انها جديدة ؟
المعقد : مش عارف بحس انى مش انا ... مش واخد على الوضع دا ... يعنى انت مش كل يوم بتلبس حاجة جديدة وبصراحة انا بحب العشرة بيبنى وبين الهدوم واى حاجة عايش معاها .
أنا : وربنا أنت حكايتك حكاية
المعقد : اه والله والواحد تعبان قوى ومش عارف يعمل ايه .

الثلاثاء، 8 سبتمبر 2009

أنا ليه معقد !!؟؟ س & ج


س : هو ياترى انا ليه معقد ؟
ج : لو اعرف كنت قولتلك

س : يعنى هو انا بس اللى معقد ولا فى ناس كتير معقدين
ج : أكيد طبعا أنت وناس كتير معقدين

س :ويا ترى بقى هما معقدين من ايه ؟
ج : أكيد كل واحد عنده المشاكل اللى تكفيه

س : طيب اعمل ايه عشان مبقاش معقد ؟
ج : ههههههههه اعمل معقد ... بجد صدقنى ... احلى حل انك تعمل معقد .. وفى قاعدة بتقولك نفى النفى إثبات .. ولما تعمل معقد وأنت معقد ... هتبقى مش معقد خالص ... دى وصفة سهله .. دى وصفة هايله .

س : طيب يا ترى أعمل ازاى معقد ؟
ج : ممممممممممممممم طيب هو انت معقد ازاى؟؟؟

س : ازاى بتسالينى يا " ج " انا ال " س " اللى بسال أنتى تجاوبى وبس ... أعمل ازاى معقد ؟
ج : اه صحيح لا مؤاخدة .... اعمل معقد زى ما انت ... انت معقد خليك معقد .


س : طيب انا معقد ازاى؟ ما انا مش عارف انا معقد ازاى ؟
ج : ما انا قولت كدا قولت اطلعوا من البلد .... خلاص شوف واحد معقد تانى او واحده معقده واعمل معقد زيهم .

وجارى البحث عن معقد او معقده .... عشان العب دوره
ولما اشوفهم إن شا الله ابقى اقولكوا اللى حصل .

الخميس، 3 سبتمبر 2009

أنـــــــا فــــــــاشــــــــــل



الفشل هو العذاب العقلى الذى قد يصيب الانسان لانه يحس بانه لا يستطيع ان ينجز اى شىء فى حياته ... بل يحس انه يكاد يكون كالحيوان او الجماد ... يشعر انه بدون عقل... او مع وجود عقل " زى قلته " يصبح التفكير الضياع اقرب بكثير من التفكير فى اسباب الفشل .
لكن .... كيف افكر فى اسباب الفشل وانا فاشل ...." يعنى تيجى ازاى دى واحد فاشل يفكر ازاى ينجح ... طيب ما هو فاشل... مخه فى اجازة على طول .... وعلى عرض .. وعلى ارتفاع " كيف اعالج ذلك الفشل الذى تفشى كالمرض واصبح يداهمنى فى كل شىء .
كانت البداية منذ ايام الثانوية العامة وكنت ملتحق بالقسم العلمى وكان جميع الاساتذة ينبئون لى بمستقبل مشرف ليس لانى عبقرى ولكن كما قالوا " مخى نضيف " إلى ان جاء موعد الفشلة الاولى " الدراسية " فى النتيجة .... وقد علمت من اصدقائى نتائجهم قبل نتيجتى وكان من فشل منهم فشل فى مادة او مادتين على الاكثر لكن انا ..... فشلت فى كل المواد ..... قد يكون المجموع الخاص بى اكبر منهم بفرق ليس بقليل ولكن كان الفشل فى كل المواد .
لقد فقدت فى كل مادة 10 درجات " جبت 40 من 50 فى 3 مواد " فى حين ان اصدقائى حصلوا على " 25/50" فى المادة اللى قسمت احلامهم اللى شطرين .... لكن انا احلامى اصحبت اكثر من شطر وشطرين و ثلاثة .
وقالى لى استاذ بعد النتيجة ان المشكلة ليس فى انى ضعيف فى مادة معينة مثل باقى زملائى .. ولكنى اعانى من مشكلة تؤثر على جميع المواد .. ولكن انا لا اعلم ماذا تكون تلك المشكلة .
إلى هنا يكون قد تمت الفشلة الاولى فى حياتى بنجاح حيث حان الوقت الى الانتقال الى الفشلة الثانية " الاجتماعية " وهى النتيجة الطبيعية للفشلة الاولى " الدراسية " فاصبحت وحيداً لا استطيع الكلام او الحديث ... كنت اشعر بان على لسانى سلاسل اذا نطقت بكلمة اكاد افقد بها لسانى ... فاصبحت بعيداً عن اصدقائى ... إلى أن جاء دور أسرتى ... التى اكملت على ما بقى منى فتات ... فكثرت المشاكل بينى وبين اسرتى .. الى ان اصحبت لا افارق جدران غرفتى ... لا اريد أن اعرف اى شىء عن اى شىء .. لا افكر فقط الا الموت وباى طريقة.
وبدا الصراع بينى وبين نفسى وبدات الفشلة الثالثة الفشلة " النفسية " فاصحبت اتمنى الاذى لنفسى اصحبت اكره كونى وذاتى .. لا ارغب فى ان اكون انا ... اريد ان اكون اى شخص اخر ... او ان اكون حيوان او اكون جماد ... المهم لا اكون انا ذاك الفشل ... واصحبت اكره نفسى ... واصحبت نفسى هى الاخرى تكرهنى .. واصبحنا فى صراع دائم لا ينتهى .
وقادنى الطريق اللى الفشلة الرابعة الفشلة " الدينية " فاصحبت بعيد كل البعد عن الله .... شعرت ان الله قد تخلى عنى وانه قد خلقنى فى الدنيا لكى يعذبنى فيها " كان تفكيرغريب استغفر الله العظيم " وبما انى فشلت فى الطاعة .... فالطبع لن افشل فى المعصية .
لكن بفضل الله ... بدات افكر فى حلول لتلك الفشلات الثلاث فى حياتى وبدأت " بالفشلة الدينية " وعلاقتى مع الله حيث انه لن ينفعنى الا هو ... لن اجد ابى وامى واخواتى واصدقائى ولكنى سوف اجده هو ... وبدات علاقتى بنفسى تتحسن شيئاً فشيئاً إلى أن استطعت أن احسن من " الفشلة النفسية " واصبحت اخاف على نفسى فهى ليس لها سوى ... واصبحت انا وهى اصدقاء " ما محبة الا بعد عداوة " إلى أن حانت الفرصة لكى اصلح بينى وبين اصدقائى واصبح لسانى قادر على الكلام " والرغى بقى وكدا " بل كنت افضل مما سبق ... لكن ، علاقتى مع اسرتى لم احاول ان اعالجها ... لا اعرف لماذا .... قد يكونوا هم سبب تلك المشاكل جميعا في حين شعورى بالفشلة الاجتماعية " الاسرية " جاء متاخراً ... لا أعلم ... ولكنى كنت لا اشعر بالذنب بل كنت اشعر بالثقة فى الذات لشعورى كونى منفصلاً .
ومرت الايام ودخلت المرحلة الجامعية وبدات افكر فى العلاقة الاسرية وكيفية اصالحها ... الى ان جاءت مناسبة سعيدة وقمت باصلاح من دمرته الايام .
إلى ان بدا الصراع الاسرى مرة اخرى ... وكان هذه المرة اشد ضراوة من تلك السابقة ... فلم اتحمل ذلك الصراع ... وبدات الايام تعيد نفسها " رجعت ريما لعادتها القديمة " وبعد اقدح من نفس الكاس مرة ثانية وبدا الفشل يسرى مرة اخرى ولكن هذه المرة سوف يقضى عليا ولن يرحمنى .
وحين اذا اصحبت فاشلا فى كل شىء وانعدمت ثقتى بذاتى ... ولم اعد اشعر بانى لى قيمة بداخل تلك المجتمع ...واصبحت فاشل .. فاشل ... فاشل .. بمعنى الكلمة .

الأربعاء، 2 سبتمبر 2009

أنا مش معقد أنتو اللى معقدين


لما اتولدت وجيت الدنيا كنت تمام لا فيا حاجة وحشة ولا حاجة حلوة بس الناس بتقول الفطرة انك بتبقى كويس لحد ما كبرت شوية بقيت بشوف الناس بتعمل ايه وانا مش فاهم هما بيعملوا كدا ليه كنت عامل زى الكاميرا الفيديو عماله تصور كل حاجة بس انا مش فاهم حاجة من اللى باخده من الناس دى ... لحد ما كبرت كمان شوية وبدات افهم اللى كانت عينيا بتصوره وبقيت مش عارف هو دا الصح ولا دا الغلط ... عشان انا للاسف مش بمشى كدا وخلاص .... انا مبقولش لا ... ومبقولش اه ... بس لازم افكر ومبقاش رايح مع اللى رايح وجاى مع اللى جاى ومن هنا بدات العقدة بقيت مش عارف مين فينا اللى صح ومين فينا الغلط ... طبعا انا مش بقول انا صح ... بس برضوا انا مش غلط .... ويمكن الناس هما كمان كدا .... بس انا لو بقيت غلط الناس هى الاساس دا وانا بكمل عليه ... لانى كنت كويس ... والله كنت كويس ... بس برضوا الناس ذنبها ايه ... ما هو اكيد ناس تانية هما اللى عقدوها ... والناس التانية اكيد ناس تالتة برضوا عقدوها ... طيب وبعدين .... اكيد انا هيجى على يوم واعقد ناس بعدى .... طيب اعمل ايه .... ابقى معقد بقى وخلاص واعقد اللى بعدى
لالالا انا مش معقد ومش هبقى معقد ... انتو عاوزين تبقى معقدين انتو احرار ... انا هحاول ارجع كل حاجة كانت كويسة فيا ومليش دعوة بحد انت لو بتعمل حاجة عشان خاطر الناس ..... الناس مش بيعجبها حد وغير كدا او كدا انا اريح الناس ليه؟ هما بيريحونى فى حاجة ... دول تاعبنى فى كل حاجة ... خليهم هما بعقدهم وبحالهم وبمحتالهم ... والحق اانا نفسى وابقى كويس انا مش معقد ... بس افرض انى بقيت معقد ... يا ترى هعمل ايه؟؟؟؟ اعيش واموت معقد دا انا هيبقى عندى عقدة انى معقد .. غير طبعا القعد اللى هستوردها من الناس ويبقى عندى مزرعة عقد ويمكن اتاجر واصدر عقد لبلاد بره ابقى معقد بريمو :(


انا تعبت
.. العقد فى كل حتة.... فى مكان .. واحد يقولك الناس جرالها ايه ... الناس اتغيرت ..... الناس اتقلب حالها ... ويجى فى الاخر يقولك ... الله يرحم الزمن الجميل ..... اهو دا واحد عقدنى بالزمن الجميل بتاعه